MEDŽUSLOVJANSKO UMĚTNIČSTVO rolja, filozofija, forma versija 1.0.0 Čto jest Umětničsky Server

(1.1) Server umětnikov jest “filial” Medžuslovjanskoj Besědy, kaky je porodil se kako efekt izměn v samoj Medžuslovjanskoj Besědě. On jest iztvorěny umětnikam i ljudam kaki sut interesovani v medžuslovjanskoj kulturě i kulturě voobče. Jego porodženje jest znak, že hčemo razširjati medžuslovjansky prostor v internetu.

(1.2) Možno zato skazati, že razdělěnje MS-Besědy na “tematične” servery jest kakoby Vtora Doba medžuslovjanskogo interneta, kaka izhodi direktno od centra, kakym jest Medžuslovjanska Besěda.

(1.3) My - prvi koristniki - ne možemo zabyvati kde je byl (i jest cěly čas) naš prvy dom, kde byl (i jest cěly čas) centr. Naše město v prostoru MS-interneta

(2.1) Vsi razumějemo, tako myslju, že medžuslovjansko umětničstvo bude sjedinjati ljudi, kaki sut interesovani v medžuslovjanskym umětničstvu. Zato uvěrjeno tut bude prostor za vsih tvoritelji i odbircev medžuslovjanskogo artizma. To budut očevidno vse teksty - povědky, anekdoty, poeziju, teksty pěsnje i tako dalje.

(2.2) Ale potrěbno jest zapytati jedno važno pytanje: “či jest li to zapravdu vsečto?”. Moj odgovor jest: “ne”. Po mojemu mněnju naša čest prostora trěbuje byti zapolnjena vsimi umětnikami, kaki prosto něčto tvoret - rysovniki, maljari, skulptori, komiksovniki, aktori, filmovniki, tvoritelji muziky, kompozitori, muzikalni izkonavniki (insrtumentalisti, pěvatelji), jutuberi, tiktokeri, memovniki, pisatelji, poeti, i až umětničski teoretiki: od historiji umětničstva, od teoriji muziky, maljarstva, aktorstva i tako dalje, i tako dalje.

(2.3) Potrěbnujemo takože ljudi, kaki ne sut direktno svezani s umětnostju, ale sut svezani s jezykom (kako priměr možno dati kooperaciju Mito i jezykoljubcev v čas tvorěnja pěsnje Masovo Pogrěbanje).

(2.4) Može byti, e to izgledaje kako veliky nered, ale tutčas jest nas dost malo, itak možemo iztvoriti něčto čto bude generalno za umětničstvo. Može byti, že v budučnosti naš server (podobno kako MS-Besěda) bude se razděliti na menše temy, kake jesm dal povyše. Tutčas to ne jest kvestija za nas - prvyh koristnikov. Moja propozicija zato jest takova: “server trěbuje byti prostor za vsih umětnikov - za jih promociju, za jih stvary, věči, za jih umětničstvo”.

(2.5) Imamo tut něčto, čto budu imenovati “Razděljenje” - a jest to Razděljenje na dva prostora: prostor za razvoj medžuslovjanskogo umětničstva, i prostor za razvoj naših umětnosti voobče. Začto tako? Pozrijte: kako jeste napriměr risovnikom i hčete dělati něčto za razvoj MS-a togda vy ne iměli ste do togo momenta nikakogo prostora v internetu v kakym budete mogli jednočasno děliti se svojeju umětnostju i širiti MS hvala njej. Medžuslovjansky trěboval i dalje trěbuje širjenja razumlivosti, a težko jest dati dokaz razumlivosti, kako vy tvorite někakovu risovanku. Zato medžuslovjanska skupina sbiraje vokrug sebe ljudi, kaki tvoret někakove teksty. A čto može sdělati tvoritelj “nejezyčnoj” umětnosti?

(2.6) I zato hču daby naš server byl prostor za vsih. Ty - risovniče, ty - skulptore, ty - aktore pantomimy, vy jeste prizvani do nas, kako važna čest medžuslovjanskoj kultury. To Razděljenje děli server na dvě česti - čest Jezyčnoj Umětnosti i čest Němoj Umětnosti - obě sut veliko važne (ili “obě sta veliko važna” ;>). Naša rolja v razvoju i promociji medžuslovjanskogo jezyka

(3.1) Potrěbno izrěkti jednu važnu věč: umětničstvo jest veliko važne za razvoj jezyka. Jest ne menje važne než rabota jezykoljubcev, analizatorov i tako dalje. To my - tvoritelji - držimo v naših rukah veliku odgovornost za to kako izgledaje jezyk, kako se razvivaje i širi.

(3.2) Zato my - tvoritelji Jezyčnoj Umětnosti imamo na sobě odgovornost kaka jest soglasna s Filozovjeju Medžuslovjanskogo Jezyka. A ta filozofija može byti opisajema kako jedno slovo: “razumlivost”.

(3.3) Prěd jezyčnymi umětnikami stoji veliko zadanje bytja razumlivym v svojej umětnosti. Myslju zato, že zadanje cělogo servera jest soglasno s filozofijeju: govoriti, tvoriti, pisati najvyše razumlivo kako jest možno. Čto ne jest naša rolja

(4.1) Toj server ne jest za diskusiju o medžuslovjanskom jezyku voobče.

(4.2) Za diskusiju imamo už prostor: Medžuslovjansku Besědu i jej kanaly (napriměr jezyčne-besědy). My ne možemo dozvoliti sobě na velike diskusije o tom čto jest vyše korektno, čto jest vyše razumlivo i tako dalje - my trěbujemo už dobro znati kaka jest naša odgovornost.

(4.3) Zato myslju, že my trěbujemo vyše mnogo medžuslovjanskogo “purizma”, než imamo na MS-Besědě. My trěbujemo uznati, že vněšne iztočniky medžuslovjanskogo jezyka sut svete i imajut prioritet. To se tyče slovnika, sajtov s gramatikoju i tako dalje. To ne jest važno či sut li one etimologično korektne ili ne - za nas važno jest daby iměti někakovy standard i njim govoriti.

(4.4) Akoli něčto jest ne tako kako hčemo v medžuslovjanskom, tako jest nam potrěbno idti do Medžuslovjanskoj Besědy i tam diskutovati o izměnah MS-a.

(4.5) Diskusija v prostoru umětničstva: povyšanje razumlivosti teksta pěsnje, povědky, poezije; diskusija o rimah; diskusija o tom či možno v někakym slučaju odojdti od standarda MS v někakym umětničstvu jest dozvoljena i potrěbna. Za takovu diskusiju imamo toj server. Kako pisati i govoriti

(5.1) So svojej strany preporučaju v dnešnyh diskusijah koristati standard medžuslovjanskogo jezyka so standardnym pravopisom, ale to ne jest obvezno - akoli ljubite koristati etimologične bukvy tako to ne jest problem. MS dozvaljaje različne formy pravopisa, itak ja ne imam pravo daby vam govoriti kako možete a kako ne možete pisati.

(5.2) Dopoka vaše pisanje ide zajedno s Filozofijeju MS, tako ne jest problem. Pametajmo o vsih zlyh sindromah MS, o falšivyh prijateljah i o vsih dobryh praktikah kake znajemo iz Medžuslovjanskoj Besědy. Prosto hču skazati, že toj server ne jest za jezyčne eksperimenty - to ne jest ješče tuta doba razvoja i promocije MS, daby smo mogli idti v kreativnost (na žalost ili ne na žalost).

(5.3) Imam jedino jednu prosbu - akoli někto vas ne razuměje, to prosto napišite jemu něčto prostěje. Ja už od časov Velikoj Reformy koristaju standardny pravopis i v takym pravopisu budu pisati vsaku oficijalnu komunikaciju na serveru. V vsakodennoj besědě razumlivost prěd vsim, v umětnosti diskusija! Kako budemo razvivati server

(6.1) Moja propozicija jest daby idti směrom MS-Besědy i iměti glasovanje za vse věči na serveru. Dopoka jest nas dost malo tako bude težko iztvoriti někaky standard za glasovanje, ale takože myslju, že budemo mogli se brzo dogovoriti v někaky prosty sposob.

(6.2) Moja prosba jest, daby v toj čas velikyh izměn byti aktivny “glasovatelj” - zajedno budemo dělati toj prostor lěpšim i lěpšim vsakodenno.

(6.3) Najprvo budu iztvoriti někakovy skelet servera, ale potom ne hču daby čto-libo bylo izměnjane bez nikakogo glasovanja.

(6.4) Hču daby vsaka izměna byla glasovana, a potom daby smo mogli takože veryfikovati ju v světlu Filozofiji MS.

(6.5) Hču držiti vse najvyše transparentno kako jest možno.

(6.6) Hču daby toj dokument je stal se bazoju za někakovu generalnu konstituciju servera. Zato hču daby vsi akceptovali jego prědloženja. Akoli něčto jest za vas nejasno ili ne jeste suglasni s někakym fragmentom - pišite, budemo diskutovati i izměnjati.

(6.7) Toj dokument jest bazovan na Filozofiji MS, kaka jest, myslju, najvyše dobry izbor za osnovu čego-libo v kvestiji MS. Čto dalje

(7.1) Tutdenj (20 šestogo měseca 2021) budu tvoriti skelet kanalov. Hču takože načeti diskusiju o nazvanju servera i o simbolu kaky budemo iměti v logotipu. Hču dodati malo emoji, očevidno jesm otvorjeny na vaše propozicije v tyh kvestijah - budu pisati komunikaty direktno na serveru.

(7.2) Myslju, že možemo dati sobě jednu sedmicu na reformatorske diskusije (govorju tut o vas vsih koristnikah), a potom uvidimo čto imamo. Tutčas bude mnogo izměn na serveru, čekajte daljše komunikaty ;)