Etapy (struktura) russkogo tradicijnogo svatbenogo obreda

Alla Sokolova

Moskovsky državny universitet imeni M. V. Lomonosova, universant; specialist sociokulturnoj dějateljnosti; e-mail: mir_al@mail.ru

Struktura russkoj narodnoj svatby jest oproščeno prědstavjena v tabelě.

ključne slova: russka tradicijna svatba

The structure of the Russian national wedding is presented in the table in a simplified way.

keywords: russian traditional wedding

Russky tradicijny svatbeny obred ne byl ravnakym v različnyh regionah i navet v susědnyh selah, ale voobče možno rěkti, že on imal podobnu strukturu, obredy i smysly. Ustroj svatby byl podobnym za vsaku kategoriju naroda, to znači kralji i elity sut imali podobnu svatbenu tradiciju kako i obyčajni ljudi.

Vslěd togo, struktura russkoj narodnoj svatby može byti oproščeno prědstavjena v tabelě.

Čemu može pomagati taky oproščeny zapis? Za to čto svatba byla velikym i komplikovanym obredom, informacije o njej sut takože komplikovane za razuměnje. Ja jesm slyšala že ljudi koji čitajut informacije o tradicijnoj svatbě v Internetu, navet v Wikipediji, takože v naučnyh člankah, doslovno «potapjajut se» v morju informacij ob obredah, koje imajut jednočasno mnogo směrov. Čitanje struktury, samoočevidno, pomagaje razuměti informacije.

Kromě togo, člověk, koj pročital tabelu, už bude znati russke nazvy obredov i to može byti koristno ako li potom on može byti bude čitati knigy russkyh pisateljev ili gleděti ekspozicije russkyh muzejev, a tamo vsegda jest tema svatby.

Mnogo znajemy folklorist prof. A. L. Toporkov pisal v 2014 godu, že nauka ješče ne jest blizka k ukončenju razgledanja russkoj svatby i jestvujut mnogo nedorazgledanyh večij. Myslju že ta situacija jest dnes, zatom analizy struktury svatby sut aktualne dnes.

V tutoj strukturě možete viděti, že byl kontrast medžu žalostnymi i zabavnymi čestami svatby, i toj kontrast daval velmi krasny dramatičny efekt. Kromě togo, možete viděti, že prěd obredami sjedinjenja nevěsty i mladoženiha, isprva byli obredy konkurencij medžu grupoju nevěsty i grupoju mladoženiha. Za to čto smysl konkurencije jest obratny smyslu sjedinjenja, to takože jest drugy dramatičny kontrast, ktora imaje struktura svatby.

Svatba imala te kontrasty vo mnogyh regionah. Takože v drugyh regionah te kontrasty sut byli smenšene, napr. sěvernorusska svatba imala veliku žalostnu čest i malu veselu čest, i južnorusska svatba imala malu žalostnu čest i veliku veselu čest.

Takože jestvjut věči, za koje nepotrěbno koristati tu i podobne oproščene tabely:

• Podolg mysljenja veličejšej česti rosijskyh folkloristov, daby poznati narodnu svatbu (ravnako kako i vsaku čest tradicijnoj kultury), potrěbno to dělati bezposrědno iz žrlovyh materialov, pisemnyh, audio i video zapisov i od direktnogo kontakta s babuškami i dědkami (nositeljami tradicijnoj kultury), a oproščene struktury sut dodatne metody poznavanja, ne sut glavne metody poznavanja.
• Poredok etapov može byti različnym za razne lokalne kultury.
• Jestvuje několiko lokalnyh kultur, ktore imajut svoju osoblivu tradiciju svatby.
• Trěba pametati že svatba byla kompleksom dějstv i obredov i to možno viděti iz podobnyh tabel. Ako li někto mysli vzeti jedino čest za dělanje svatby ili dělanje tvorby, to už ne bude cělo tradicija.

Etapy svatby

• Etap za dogovarjanje o budučej svatbě.
  • Propozicije svatby, gledanje na nevěstu, mladoženiha i na domogospodarstvo, dogovarjanje o datah svatby i imutkah, zaručenje.
• Etap za žalost.
  • Čas nevěsty i mladoženiha za proščanje s prědšedšim etapom svojego života, na shodkah s prijateljami i t.d.
• Etap za konkurenciju. Tut možno viděti že grupa mladoženiha i grupa nevěsty igrajut v konkurencije medžu njimi
  • Igranje v konkurencije, napr., sposobami: slovesnyh pojedinkov medžu grupoju mladoženiha i grupoju nevěsty, takože pojedinkov trga, pojedinkov pěvanja.
• Etap za sjedinjenje mladoženiha i nevěsty. Možno viděti važne obredy, ktore sjedinjajųt hlapca i děvčinu i tvoret supružsku paru.
  • Obred prvogo sěděnja mladoženiha i nevěsty pri stolě (v domu mladoženiha).
  • Obredy v domu i v crkvě da by hlapec i děvčina postali suprugi.
  • Pir jedino za rodinu mladoženiha (v jih domu).
  • Obredy česanja vlasov, novogo učěsa vlasov i/ili ostriženja vlasov.
  • Tradicije loža (v specialnom (ne vo vlastnom) domu).
• Stupenj «Veselje»(ru веселье, весельные годы). Možno mysliti že glavna tema tut jest prijmanje novogo socialnogo statusa suprugov i shodka dorastlyh ljudij dvoh rodin.
  • Nevěsta često imaje novy dekor na glavě, novo oblačenje. Pir. Prva shodka dvoh rodin (nevěsty i mladoženiha) i pokrovnikov.
  • Pěsnje, pohvaly, slavy.
  • Zadanja, testy za suprugov.
  • Komedijni personaži, ktori dělali zabavy.
  • Suprugi vozili se do domov roditeljev nevěsty i drugyh pokrovnikov (3 denj i dalje několiko sedmic).

Avtor govori hvalu za pomoč redaktovanja teksta: Rubinolasu i Michału Swatu.