Kaliningrad

kategorija: KULTURA - OBČINA - HISTORIJA datum: 2022-10-05, avtor: aVM

Na brěgu Baltičskogo morja medžu Poljskoju i Litvoju jest malo ozemje imajuče petnadset tyseč (15 000) kvadratnyh kilometrov, ktoro nyně imaje nazvanje Kalinigradska oblast i prinaleži do Rossijskoj federacije. Glavnym gradom tutoj oblasti jest Kaliningrad, ktorogo staro ime bylo v češskom jezyku Královec, poljskom Królewiec, litevskom Karaliaučius, i němečskom Königsberg, čto v tutyh vsih jezykah bylo stvorjeno iz slova kralj po smyslu kraljevsky grad.
Kalinigradska oblast (Google Maps)

Königsberg (Královec) byl osnovan lěta 1255 od srědnjevěčnyh vitezov (križenoscev) na uvaženje i pamět češskogo kralja Přemysla Otakara Vtorogo (1233 - 1278), ktory byl znajemym evropskym vladarom trinadsetogo (13-ogo) stolětja. Do Přemyslovogo kraljevstva prinaležala netoliko oblast dnešnoj Čehije, ale takože ješče bolša čast Avstrije, Slovenije i mala čast sěvernoj Italije. Přemysl Otakar II. osnoval ili pomogl sbudovati ili razširiti v različnyh městah Evropy vyše od šestdeseti (60) gradov i petdeseti (50) zamkov i krěpostij. Jednim z njih takože byl Královec.
Grob kralja Přemysla Otakara II. v Pragě (Vikipedija)

V gradu Königsberg (Královec) byla sbudovana krěpost, v ktoroj bylo žilišče načelnika (velmistra) Ordena němečskyh vitezov i takože hram – katedrala Božjej materi i svetogo Vojtěha.
Hram - katedrala svetogo Vojtěha v gradu Kaliningad (Vikipedija)

Vojtěh (956 - 997) byl vtorym češskym biskupom (episkopom) i jest svetym patronom poljakov, zatože donesl hristijanstvo do Poljsky, kogda byl duhovnikom češskoj princesy Doubravky, ktora byla ženoju poljskogo ješče poganskogo i potom prvogo hristijanskogo kneza Měška/Mečislava (935 - 992), ktory byl osnovateljem poljskoj državy. Vojtěh takože jest avtorom najstarějših češskyh i poljskyh duhovnyh crkovnyh pěsnj i molitv, zatože v časah prěd Vojtěhom koristil se v slovjanskyh crkvah jedino crkovnoslovjansky jezyk. Vojtěh takože krestil prvogo madžarskogo kralja Štefana Prvogo, znajemogo dnes kako Svety Ištvan/Štefan (969 - 1038).
Svety Vojtěh, (detail iz obraza Jana Očka Vlašimskogo iz lěta priblizno 1370)

Königsberg (Královec) na početku byl svobodnym trgovym (hanzovnym) gradom podobno kako druge grady na pribrěžju Baltičskogo morja i drugoj sěvernoj Evropy od anglijskogo Londona črěz Hamburg, švedske grady, Gdańsk, Rigu i dalje až do russkogo Novgoroda. Kalinigrad (Královec) s jegovoj oblastju byla upravjeny pod rukovodstvom hristijanskyh vitezov. V modernom věku byl v osmnadsetom (18-om) stolětju prvym stoličnym gradom němečskogo štata Prusija (potom Berlin byl stoličnym gradom Prusije) i od lěta 1861 Prusija sjedinjena byla do němečskogo cěsarstva.
historičny centr grada – promenada (server culture.ru)

historičny centr grada – hanzove domy (server culture.ru)

Lěta 1945 Königsberg (Královec) dobyla Červena (sovětska) armija i grad s jegovoju oblastju priključeny byl do Sovětskogo sveza (SSSR). Grad dostal novy nazvu Kaliningrad od imene Mihaila Ivanoviča Kalinina (1875 - 1946), ktory formalno byl titularnoju glavoju SSSR, ale faktično rukovoditeljem SSSR byl maršal i generalissimus Josif Stalin (gruzinsky: Joseb Besarionis dze Džugašvili).
Mihail Ivanovič Kalinin (Vikipedija)

Poslě razpada SSSR lětom 1991 Kaliningrad s jegovoju oblastju jest sostavnoju častju Rossijskoj federacije, ale kako jejino najzapadno ozemje leži glubogo medžu evropskymi dražavami – členami Evropskoj unije – bez zemnogo kontakta s teritorijem Rossije, ale toliko morjskym ili vazdušnym putom.
Lětom 2022 jedin mnogo lojalny deputat rossijskogo parlamenta (Dumy) prědložil proměniti nazvanje grada na Vladibaltijsk, zatože (vladi-) v russkom jezyku znači vladati (kako vladaj!) i Rossija uže imaje grady Vladikavkaz i Vladivostok:

Vladikavkaz jest v Osetiji i prvobytno iměl v osetskom jezyku nazvanja Ordžonikidze ili Dzaudžikau, ale byl lěta 1990 proměnjeny na Vladikavkaz kako simbol rossijskoj vlady nad Kavkazom.
Vladivostok prvobytno jest činsky (kitajsky) grad Haj-šen-vaj (海參崴) na brěgu Japonskogo morja, ktory dobyla rossijska armija lětom 1860, i dostal novo nazvanje Vladivostok kako simbol rossijskoj vlady nad vozhodom.

Potom v logikě prědloženoj novoj nazvy tutogo starogo baltičskogo grada ležela by velika teritorija Rossije simbolično od zapadnogo Vladibaltijska črěz južny Vladikavkaz do vozhodnogo Vladivostoka.
Referendum o Kaliningradu
Lětom 2022 takože běželo kakoby referendum po priměru (vzoru) rossijskyh referend na okupovanyh teritorijah Ukrajiny, kde tyseče ljudij iz 97.9% hotěli vratiti Kaliningradsku oblast do teritoriji Čehije. Tutu směšku podporili različni litevski i poljski politiki, takože politiki Evropskoj unije i NATO govoreči, že češsky susěd byl by poljakam i litevcam mnogo lučši od rossijskogo. Ambasada SŠA (USA) v Pragě prědložija Čehiji darovati vojenny samoletovy korab imene Karel Gott. Takože na mnogyh veb-sajtah izobrazili Královecký kraj (Kralovečsku oblast) kako novu oblast Čehije.
Královec kako nova oblast Češskoj republiky s popytkoju i dostavkoju nedvižimostij (server sreality.cz)

Prognoza vrěmene v češskoj televiziji (Tviter)

Vojenny samoletovy korab imene Karel Gott (Tviter)

Přemysl Otakar II. - Vikipedija (...en.wikipedia.org/wiki/Ottokar_II_of_Bohemia)
Svety Vojtěh - Vikipedija (...://en.wikipedia.org/wiki/Adalbert_of_Prague)
Hanzove grady sěvernoj Evropy - Vikipedija (...ps://en.wikipedia.org/wiki/Hanseatic_League)
Mihail Ivanovič Kalinin - Vikipedija (https://en.wikipedia.org/wiki/Mikhail_Kalinin)
Vladibaltijsk - prědloženje novogo nazvanja (...://medialeaks.ru/0407aad-str-sct-vladizapad)
Referendum o Kaliningradu - server newsweek.com (...kaliningrad-russia-signed-thousands-1749063)
Češsky Kaliningrad - satiričny vebsajt (https://visitkralovec.cz)
Moscow Times o referendumu (...bout-annexing-kaliningrad-goes-viral-a79003)

QR-kod članka