Kde ja se učim medžuslovjanskogo jezyka? (+prizvanje za Discord)

Pozdrav ko vsim! Jesm Melac, dobrodošli. Znam, da mogut tu byti ljudi, ktori hoču zadati mi pytanje, ktore jest v nadpisu togo video, zato ja hoču na nje dnes odgovoriti. Kako jeste uslušali prvo načel jesm govoriti na anglijskom, potom na poljskom, da by drugi ljudi, ktori ne znajut dobro medžuslovjanskogo tož mogli věděti, čto budu govoriti v tom video. Dnes razkažem kako i kde učim se medžuslovjanskogo. Nakonec jesmo prigotovali malogo supriza, dakle ostanite so mnoju. Milogo gledanja!

Jedno lěto tomu, avgustom, jehal jesm avtobusom do Opolja. Bylo rano jutro, a ja jesm se dolgočasil i gledal v YouTube. Poněkogda ljubim gledati filmy iz kanala Mówiąc Inaczej (Inače Govoreči ??? ), a v tamtom konkretnom, ktory togda jesm uviděl, dověděl jesm se, da někogda na poljskom tož koristalo se podobnu konstrukciju do dnešnjego hrvatskogo “dobrodošli”. Potom jesm pozril v rekomendacije i našel jesm video iz kanala Ecolinguist (i tut uvěrjeno historija česti ljudi jest ravna s mojeju). Očevidno bylo to video ob medžuslovjanskom jezyku (link imajete v opisu u dolu). Směsta jesm načel se interesovati ovym jezykom i črěz několiko naslědnyh měsecev postojanno gledal jesm te několiko filmov, ktore bylo možno najditi vpisyvajuči v iskalnik slovo “interslavic”. Jednakože doprva v juniju togo lěta postanovil jesm tako napravdu načeti se učiti medžuslovjanskogo. Ale... kako to izdělati? To ne bude tako obyčajno učenje se novogo jezyka, zato, čto ja už velje jego razuměm, velje už znaju. Trěbuju zatom vse usystematizovati, razměstiti. Tako tož jesm načel činiti. Jesm všel na sajt Jana van Steenbergena i onoj jesm načel učiti se gramatiky, koristajuči iz mojej sobstvenoj sravnjajučej metody. Fungovala ona tako, da ja jesm bral někako pravilo iz poljskogo jezyka i jesm poziral kako se ona sravnjaje s medžuslovjanskym. Polna gramatična analiza trajala několiko dnji, hot dnes znam, da budu trěbovati někogda vratiti se i ješče jedin raz pročitati někake detalje. Priklad: Jesm pisal sklanjanje někakogo imennika na poljskom, a potom jesm prověrjal kako jego “vzor” jest soglasny s medžuslovjanskym vzorom. Naslědno to samo poljsko slovo jesm sklanjal na medžuslovjanskom vzoru. Čestno: to jest bez malogo vsečto, čto ja jesm dělal v tom prvom etapu učenja. Potom bylo za mene potrěbno už jedino najditi někako město, kde budu mogti pisati i govoriti na tom jezyku. Na ščestje jesm trafil v genjalno město - Medžuslovjansku Besědu - mnogo aktivny Diskord server s odličnym družstvom. Onoj našel jesm velje okaziji da by ulěpšati moj jezyk, praktikovati jego i provoditi prosto čas v prijemnyh besědah. Čto jest zajmlivo - sut onoj ljudi, za ktoryh medžuslovjansky jest prvy slovjansky jezyk. Jih nauka jest druga historija, ktoru mogu kratko razkazati na anglijskom ako li neslovjanskogovoritelji budut togo hotěli (pišite v komentarah). Na početoku ljudi pomagali mně izslovjati se, potom už moj medžuslovjansky dostignul taky rang, da už toj pomoči jesm te trěboval tako često. To točno onoj, na Medžuslovjanskoj Besědě načel jesm poněkogda proponovati ljudam bystre, kratke “besědki”, ktore jesm načel imenovati “Medžuslovjanska Kava”. Ne bylo jih velje, ale jesm pomyslil, že mogu izkoristati ovu nazvu i zaměniti ju v maly podkast na mojem kanalu. Jednako ne vsi ljubet kavu, zato tož nazva jest tutčas “Medžuslvojanska Kofeina”. Kako dnes učim se jezyka? Dalje govorim na Diskordu. Radujem se, kogda vidžu, da mogu časom prilučiti se do glasovoj besědy i dobro se baviti pri memah, diskusiji i mimohodom nabirati dobre navyki za govorenje. Sam tož tvorim memy, filmy, čitam i pišu. Medžuslovjansky, na kakom my govorimo na Medžuslvojanskoj Besědě jest analizovany a dobri ljudi često napominajut kogda činimo pogrěški. I tutčas prišel čas za supriz. možete uslušati kratku analizu historiji servera od samogo ustanovitelja - Antona. Jest mi mnogo prijemno pokazati jego material tut, na mojem kanalu. Prizivam, gledajmo.

[film Antona]

Za mene nauka medžuslovjanskogo jezyka nikogda ne byla normalna. V prvom etapu jesm analizoval věrojetno večinstvo poljskoj gramatiki, naslědno načel jesm ju směnjati na bolje medžuslovjansku. V drugom etapu prišel jesm na Diskord server i tam načel jesm čitati i pisati. Dnes, v tom trětjem etapu ješče ne smogu běglo govoriti kogda nemaju gotovogo teksta. Pomimo togo bezprěryvno pokušam to činiti, a budete mogli to uslušati už nedolgo na mojem kanalu. Linky do sajta Jana van Steenbergena i prizvanje na Medžuslovjansku Besědu možete najditi v opisu u dolu video. Srdečno prizivaju! Blagodarim za gledanje, vidimo se!