Pozdrav ko vsim! Dobrodošli na kanal! Ako li jeste už sdělali svojų porcijų kofeiny to možemo načinati! Ja jesm počętkovo hotěl da by Medžuslovjanska Kofeina iměla formų podkasta bez nijednyh obrazov, kartin, prosto bez ničego vizualnogo i tako očevidno bųde, ale ješče ne dnes. Dnes bųdų govoriti ob tom kako jesm učil sę gramatiky medžuslovjanskogo języka i tož bųdų pokazivati neveliko obrazkov s prikladami. Ja bųdų vam govoriti kogda na ekranu možete uviděti někake kartiny. Kako jesm govoril v prědhodnom video - gramatiky jesm učil sę iz sajta Jana van Steenbergena i koristal jesm takų improvizovanų sravnjajųčų metodų. V tom video hočų razkazati něčto vęče ob tom kako točno jesm to dělal. Ja ne jesm językoznalec ili lingvista, ale znajų jednų važnų věč, ktora pomogla mně naučiti sę medžuslovjanskogo: drugy slovjansky język. To jest video za slovjanskogovoriteljev - ljudi, ktori sųt v takoj samoj situaciji kako ja jesm byl. Ob čem zatom bųdų dnes govoriti? Prvo razkažų ob tom čto jest potrěbno věděti, znati prědže, prěd učenjem. Vtoro bųdų govoriti ob prvyh dnjah nauki - čto i kako jesm dělal. Naslědno bųdų rěkti ob tom na čem jest potrěbno sę sųsrědotočiti v naukě. Nakonec skažų čto bųdete uměti a čego ješče ne bųdete uměti po učenju ovojų metodojų. Prizivajų, načinamo!

Čto jest potrěbno znati prědže?

Mysljų da najvažnějše čto trěbujete znati jest gramatika vašego rodnogo języka. Znajų da věte kako jų koristati na vaš rodny język, ale tut lepje jest věděti tož kako ona funkcijonuje teoretično. Bez togo tož jest možno ale bųde vyše tęžko. Jest dobro věděti čto sųt padeže, kako one funkcijonujųt, kake sųt vzory jih koristanja. Jest dobro znati sovršeny i nesovršeny vid, časovanje glavolov i druge. Vtora věč, ktorų jest dobro znati to anglijske gramatične slova i, na žalost, voobče anglijsky język. Očevidno už dnes jestvujųt někake prěvodženja gramatičnyh pravil na druge slovjanske języki, ale ja ne znajų kde točno jest možno je najditi - trěbujete iskati na fejsbukovoj ili diskordovoj skupině - kogda hočete učiti sę iz sajta Jana - trěbujete znati anglijsky. Ako li věte už vsečto ob tem čto trěbujete znati prědže - možemo načinati sę učiti!

Prve dnji nauki

Vo prědhodnom video govoril jesm, da moja nauka načinala sę od sklanjanja poljskyh slov na medžuslovjansky vzor. Jesm tako činil so vsim - pridavnikami, glagolami, imennikami i činil jesm to aktivno dělajųči zapisky. Na ekranu imajete několiko prikladov na raznyh slovjanskyh językah. To jest sklanjanje imennikov iz različnyh językov na medžuslovjansky vzor. Možete to dělati i pozirati kake sųt razliky medžu vašim językom a medžuslovjanskym. Uvěrjeno ne bųde onoj mnogo razlikov a vęčinstvo sufiksov bųde jedinako. Ne trěbujete, mysljų, dělati togo prěmnogo, ale možete sdělati několiko raznyh slov (ženskogo, mužskogo, srědnjego roda, mekky, tvrdy vzor - jedino, da by uviděti, ne da by mnogo praktikovati). Kogda bųdete razuměti te razliky to bųdete mogli praktikovati sklanjanje na medžuslovjanskyh slovah - ja činil jesm to na rodnom języku bolje zato, da prosto ne znal jesm mnogo medžuslovjanskyh slov. Kromě togo ja jesm čital i dělal zapisky iz polnoj gramatiky medžuslovjanskogo tako, da by uviděti čto jest ravno s mojim językom a čto jest polno različno. Po takoj aktivnoj praktikě bųdete znali vse potencialne problemy, ktoryh bųdete trěbovati sę strěgti, kde bųdete trěbovali byti ostražni. Skazal jesm vam čto dělati - tutčas ješče hočų rěkti - kako dělati.

Na čto pozirati v naukě

Kogda sę učiš medžuslovjanskoj gramatiky sravnjajųči jų do svojego rodnogo języka cěnno bųde postojanno zapisyvati vse razliky medžu njimi, vse věči, ktore sųt na medžuslovjanskom a na tvojem rodnom języku jih nemaje. Tutčas imajete na ekranu priklady. Prvy priklad jest na poljskom języku i tykaje sę prizhodženoj formy glagola. Drugy priklad može byti razlika medžu instrumentalom a lokativom pri sklanjanju pridavnikov. Ov priklad tož tykaje se poljskogo języka. Trěti priměr može byti bukva “y”, ktora jest tęžka za južnyh Slovjanov, jerbo oni jej ne koristajųt. Ješče može byti tęžko kogda iztočni Slovjani ne znajųt latinskogo alfabeta. Nu i naopak - kogda zapadni i južni ne znajųt kirilici. Mysljų, da vo vsih slovjanskyh językah jest něčto, čto čini někake problemy v naukě - ale to ne sųt velike věči. Važne jest da by je znati i osvojiti. Potom to už ne jest tęžko. Na žalost, ili ne na žalost - vsečto jest trěba poznati, pročitati i srazuměti - jedino togda jest možno svědomo koristati krasny, razumlivy medžuslovjansky. Ješče jedin sovět - ja jesm sę prvo učil etimologičnogo pravopisa i prvo pisal jesm na etimologičnom. Mysljų, da lepje jest znati vęče bukv i věděti čto one značųt, něž znati malo bukv. Potom jesm odstųpil od pisanja na etimologičnom i načęl jesm pisati standardnom pravopisom. Učinil jesm to doprva togda, kogda uznal jesm da to už jest toj čas, že razumějų razliky. Etimologičny pravopis može byti pomočny kogda načinaješ flavorizovati svoj medžuslovjansky i hočeš to kontrolovati. Priklad na ekranu.

Čto bųdeš už uměti a čego ne bųdeš ješče uměti po učenju?

Ako li mysliš, da v tydenj jest možno naučiti sę polnoj gramatiky medžuslovjanskogo języka to... blizno imaješ pravdų. Jest možno sę jej naučiti, ale trěbuješ ješče slegka časa, da by běglo jų koristati. Kogda pročitaš i srazuměš vse pravila, kogda uvidiš vse potencijalne pogrěški, ktore možeš počiniti to ne znači, že ne bųdeš jih činiti. To čto bųdeš potom trěbovati to poznanje najbolje razumlivyh konstrukciji. To, da mysliš, že ljudi bųdųt tebe razuměti jerbo ta konstrukcija jest v tvojem języku - to grěška. Ne možeš tako mysliti. Medžuslovjansky jest regularny, dost prosty, ale tož mnogo prosto jest izgubiti jego razumlivost - a razumlivost jest, pripomnimo, jego celj. Kogda už vsečto sdělaš načinaj govoriti, pisati i čitati teksty. Ja tož tako jesm načinal činiti. Na ekranu imajete priklad togo kako izględal moj prvy medžuslovjansky. Poniže bolje korektna versija:

Ja ne znam ješče medžuslovjanskogo dobro, ale izproboje něčto napisati. To ne jest mnogo trudno, bo medžuslovjanski ma podobny izvųk do poljskogo. Pisanje i čitanje jest trohe trudne, bo pravopis jest slegka iny, a daže vyše iny.

Ja ne znajų ješče medžuslovjanskogo dobro, ale bųdų pokušati něčto napisati. To ne jest mnogo tęžko, jerbo medžuslovjansky imaje shodny zvųk do poljskogo. Pisanje i čitanje sųt slegka tęžke, zatože pravopis jest neveliko drugy, a daže mnogo drugy.

Pamętaj: praktikovanje jest najvažnějše. Kogda ne znaješ kako něčto napisati to: Ględaj vo slovniku Kogda dalje ne znaš kako: pytaj ljudi Kogda napravdų ne věš - napiš kako mysliš že bųde korektno i dodaj, že ne jesi uvěrjeny Jedinako dělaj kogda ne znaješ kako něčto skazati. Počętkovo ne jest prosto govoriti na medžuslovjanskom, ale pamętaj, da vsi ljudi, s ktorymi govoriš takože sę učųt. Možeš skazati “ym, ljudi, čekajte, ględajų do slovnika” - i vsi bųdųt tebe razuměti. Ne boji sę že bųdeš činiti pogrěški - vsi je bezprěryvno činimo.

Mysljų, da jesm rěkl vsečto, čto jesm hotěl. Ako li imajete někake pytanja - pišite očevidno v komentarah. Pišite tož či bylo li vam ovo video pomočno. Blagodarjų za ględanje! Vidimo sę!

Pivo pito Janom. Pivo pijemo Janom.