Međuslovjansky kako lingvističny most.

Pozdråv ko vsim! Dobrodošli na kanal! Někogda bylo mně postavjeno takovo pytańje: “či po tvojemu mněńju vse slovjanske języki sųt li zaisto jedin język?”. To jest zapravdų prěveliko dobro pytańje i ja hoćų dnes něčto vęće o tom råzkazati. Či dŕžite li už vsi svoje porcije kofeiny? Da? Zatòm načinamo!

Pŕvo trěbujų rěkti jednų věć: vsečto, čto bųdų govoriti v tutom filmu jest jedino moje mněńje i to, kako ja zaisto čujų. Naučne fakty i teorije sųt vsegda najvažnějše, a ja ne jesm językoznalec, daby tvoriti tut někake nove interpretacije pòlnoj historiji i evoluciji slovjanskyh językov. To bųde film o tom kako rodimy koristnik slovjanskogo języka čuje međuslovjansky i druge slovjanske języki. Či zatòm po mojemu mněńju rodina slovjanskyh językov jest li zaisto jedin język? Bystro odgovarjajųći - da, iz mojej perspektivy mogų tako tutčas rěkti. Či vsegda tako jesm myslil? Ne. Kògda už jesm sråzuměl, že jestvuje někaka podobnosť među slovjanskymi językami, tògda slyšal jesm tute języki kako malo råzumlive varijanty mojego rodnogo języka. Něktore očevidno råzuměl jesm vęće, něktore menje - ale generalno byly to za mene zaisto druge, ine języky. Kògda minoval čas ja učil jesm sę vęće i vęće međuslovjanskogo języka. Iznenada načęl jesm ględati na vse języki kako na prěvelikų, råzličnų rodinu. Očevidno ja dalje ne råzumějų vsečego, čto govorųt drugi Slovjani, ale už dnes lěpje råzumějų něktore języki. Začto? Zato, že međuslovjansky ima gramatičnų osnovų vsih slovjanskyh językov i zaisto funkcijonuje kako někaky most, sjedinjajųći vse języki. Za mene vsegda to byl fenomen, že Slovjani mogųt tako prosto råzuměti jedin drugogo. I dnes ja råzumějų lěpje toj fenomen. Možemo iměti čudnų fonetikų, možemo ne iměti napriměr padežev, možemo pisati tako ili inako ale nakonec vsi imajemo jednų osnovų, jedin fundament. I to jest točno to začto ja čujų, že jest jedin slovjansky język. Jest zaisto jedna osnova i jej mnogo, prěmnogo variantov. Međuslovjansky jest język, ktory jest blizko togo čistogo fundamenta - zato točno jest tako mnogo råzumlivy. Tako tòž funkcijonuje flavorizovańje međuslovjanskogo. Jest to kakoby oblěkańje osnovy, koreńja v někakų specifičnų formų - tako, daby konkretni Slovjani mogli jego ješče lěpje råzuměti. I vò flavorizacijah jest velika moć, blagodare flavorizacijam možemo inače pozriti na cělosť. Ja jesm sdělal kråtky eksperiment i prosil jesm několiko ljudi daby sdělali takų råzširjenų flavorizacijų.

Pŕvo jesm ukazal jim rěčeńje na Etimologičnom Međuslovjanskom. Potom jesm prosil daby sdělali četyri rěčeńja podòlg takovyh pravil: Pŕvo rěčeńje jest flavorizacija međuslovjanskogo na tvoj rodny język Vtoro rěčeńje jest kakoby tvoj rodny język sò međuslovjanskojų gramatikojų i međuslovjanskymi slovesami kògda sųt one vyše råzumlive. Trěťje rěčeńje jest tvoj rodny język, ale on jest dolženy iměti najvyše råzumlive slova (take, ktore jestvujųt na toj język) Četvŕto rěčeńje jest prosto tvoj rodny język.

Poslušajte pŕvo kako zvųči ovo rěčeńje:

=== Rěkl byh vam něčto ale točno ne věm čto rěkti zatòm bųdų jedino mòlčati

Tutčas idemo stěžkojų do russkogo języka:

I tutoj jesmo už v russom języku. Tutčas napriměr češsky język:

Kako zvųči stěžka do poljskogo języka? Tako:

Hočete stěžkų do hrvatskogo języka? Točno jest to štokavsko narěčje:

I nakonec ješče stěžka od međuslovjanskogo do bulgarskogo:

podtekst očevidno kirilicejų do russkogo i bulgarskogo!!!

To byl priměr takogo mosta među językami. Izvinijajų sę za moj akcent. Blågodarjų Antone, Lukašu, Mattheyo i Slavislave za vaše prěklady. Kako jeste mogli uslušati, međuslovjansky jest zapravdų blizko vsih językov. Zato ja tòž mogų rěkti, že języki slovjanskoj rodiny sųt tako podobne među sobojų, že istinno možemo rěkti, že jest to jedin, veliky język.

Mně sę to prěveliko navidi, že vsi možemo iměti svoje versije toj družnoj osnovy, a jednočasno koristati ov čisty fundament daby jesmo mogli sę lěpje råzuměti. Obožajų zvųk vsih slovjanskyh językov, i tòž zvųk međuslovjanskogo. Mysljų, že jesm rěkl v toj kvestiji vsečto, čto tutčas jesm hotěl rěkti. Pišite v komentarah či vsečto li jeste sråzuměli. A može imate drugo mněńje v toj kvestiji? Prizivajų do diskusiji! Prizivajų tòž do podpisyvańja kanala i takože do ględańja na moj Instagram o nazvě jesmmelac! Blågodarjų za slušańje! Bųďte zdråvi!