Pozdrav ko vsim!

Kako jesm publikoval prvų Medžuslovjanskų Kofeinų, tako myslil jesm, že hčų zapisati desęt filmov. Prvo htěl jesm daby Kofeina byla podkastom o råzličnyh věčah na medžuslovjanskom, ale potom tako sę stalo, že načęl jesm zapisyvati naslědne podkasty jedino o medžuslovjanskom języku. Myslil jesm, že ne imam veliko temov, o kakyh hčų tutaj besědovati, ale tutčas vidžų, že imam ješče několiko kvestiji o kakyh hčų skazati. I tako, možno izrěkti, že tutčas jesmo už za polovinų prvogo sezona Medžuslovjanskoj Kofeiny. Prizivajų zatom, slučajno, daby vzęti čaškų omiljenogo napitka i slušati! Načinamo!

Dnes hčų opisati moje ględišče za temų, kaka prěd davnym vrěmenom ja byla pričinok za dolgų besědų na Diskordu. Ja hčų tutaj opisati jedino generalno ględišče i mojų hipotezų, kaka, po mojemu mněnju, jest nemožna do potvrdženja ili oprovrgnųtja, prinajmenje v tom času. Nehaj ne uražaje vas nazva za tuto video, zatože v naslědnom epizodu bųdų govoriti o naopačnom ględišču. Hčų ukazati, že vozględ na medžuslovjanskom možno iměti råzličny i že definicija języka jest råzlična i zavisi od konteksta, situaciji i togo na čto pozirajemo. Dopoka naš cělj jest råzumlivost i my hčemo idti k njej - tako idemo v dobrom směru. Dens izobražų hipotezų “jednogo medžuslovjanskogo języka”. A zvųči ona tako: “Jestvuje točno jedin, srědno najvyše råzumlivy standard medžuslovjanskogo języka”. Čto to točno znači? Kako to råzuměti? Nu, kako jesm dumal o tom ględišču, myslil jesm v takovy sposob: Medžuslovjansky jest językom, čto znači, že on imaje svoj slovosbor, gramatikų, sintaksų, fonetikų i tako dalje. Ale to jest takože język imajųči svoj specifičny cělj - råzumlivost možlivo vsim slovjansko-govoręčim ljudiam bez učenja. Toj cělj prěveliko silno vlivaje na figurų, formų medžuslovjanskogo. I zato medžuslovjansky imaje velje pravopisov, zato imaje velje sinonimov, zato tako važno jest daby pozirati kake točno slova koristajemo, zatože ne vse sųt tako dobro råzumlivo kako druge. Specifičny cělj języka silno vlivaje na język. Možno zatom izrěkti, tako kako jesm izrěkl v prědhodnom videu, že medžuslovjansky govorjeny medžu Bulgarom i Makedoncem bųde veliko drugy než medžuslovjansky govorjeny medžu napriměr Rusom i Poljakom. Improvizovany medžuslovjansky generalno bųde iměti vęče slovesov prirodnyh jego govoriteljam než napriměr meďžuslovjansky tutogo videa. V tom momentu možno uviděti dva směry: generalny, “standardny” medžuslovjansky i improvizovany, brzy i intuitivny medžuslovjansky. Te dva směry sųt sobě protivne. Improvizovany medžuslovjansky ide k “lokalnoj” råzumlivosti medžu govoriteljami kaki točno v toj moment govoręt jedin s drugym. Standardny medžuslovjansky ide k råzumlivosti kaka jest najvęčša, najvyše možliva, “globalna”. Kde jest cělj togo drugogo směra, togo drugogo medžuslovjanskogo? Hipotetično v punktu takogo standarda, kaky globalno bųde najvyše råzumlivy. I togo standarda tykaje sę moja hipoteza. I tut potrěbno naznačiti, že srědno najvyše råzumlivy standard ne označaje, že bųde on zapravdų råzumlivy vsakomu Slovjaninu i že bųde zapravdų najvyše koristny vsegda. Ne, tako ne jest. Srědno najbojlša råzumlivost označaje, že język bųde råzumlivy najboljšej kolikosti ljudi voobče, ale ne vsim. Srědno najboljša råzumlivost označaje, že najvęče ljudi bųde izrěkti: “da, ja to råzumějų”. Akoli byhmo mogli sdělati někakų mųdrų, velikų anketų, tako mogli byhmo potvrditi ili oprovgnųti tutų hipotezų, ukazati jej pravdivost ili falšivost. Ne imamo tutčas resursov za takovo obslědovanje, ale možemo tutdenj něčto pobesědovati o toj kvestiji.

Čto po mojemu mněnju govori, že Hipoteza Srědno Najvyše Råzumlivogo Medžuslovjanskogo jest zapravdų pravdiva? Prosta matematika. Prědpoližimo, že hipotetično jesmo sdělali takovų anketų: jesmo testovali v někaky veliko komplikovany sposob několiko variantov medžuslovjanskogo języka, kake mogųt hipotetično byti najvyše råzumlive. Nehaj to sę bųde imenovati: “Metoda Ankety”. I kaky imamo rezultat? Napriměr: standard A je byl råzumlivy 98.31 procent Slovjanam, standard B je byl råzumlivy 98.35 procent a standard C 98.37 procent. To jest prěmnogo malo råzličenje, ale po matematičnom ględišču standard C jest najvyše råzumlivy. Či ta råzlika imaje veliko značenje iz perspektivy lingvistiki i cělja języka? Nu, očevidno ne. Tutčas ja govorjų jedino o tom, že hipotetičny standard v tom slučaju jestvuje. Standardy A i B sųt takože prěveliko koristne za råzvivanje języka, hot matematično ne sųt one toj hipotetičny najvyše råzumlivy standard.

Jest v tom jednako jedin problem: “Metoda Ankety” može ne jestvovati v realnosti. Čto to znači? Znači to, že my ne možemo iztvoriti takoj točnoj ankety kaka bųde ukazati råzliky medžu standardami A, B i C.

Hvala za ględanje! Akoli vy jeste uviděli někake pogrěšky, imajete někake pytanja ili hčete izraziti svoje ględišče - pišite v komentarah! Do viděnja, nehaj vaš medžuslovjansky bųde vsim råzumlivy! Držijte sę, prijatelji!