Medžuslovjansky jezyk byl slyšeny na medžunarodnom festivalu Rodokruh 2022

kategorija: KULTURA - OBČINA - HISTORIJA datum: 2022-07-18, avtor: redakcija

Subotoju 16-ogo jula 2022 odbyval se medžunarodny festival domorodnyh tradicij Rodokruh 2022 (češsko slovo rodokruh znači krug roda). Na festivalu učestovalo vyše od osmdeseti ljudij interesujučih se do slovjanskoj kultury iz Čehije, Slovakije, Poljsky, Ukrajiny, Russije i Avstralije.

Festival organizovalo češsko družstvo s festivalu ravnym imenem Rodokruh http://www.rodokruh.com/, ktoro uže podobny festival organizovalo prošlym lětom. Festival odbyval se v prostorah ranča Andy West Ranch, ktory jest pod bazaltovym vrhom Kunětická hora (gora) ležučim v nizině rěky Labe približno jedno sto kilometrov vozhodno od Pragy. Kuněticka gora jest mitično staroslovjansko i takože keltsko město, kde v davnom věku byli različne svetilišča naših prědkov i nyně tamo stoji srědnověčny zamok.
Kuněticka gora (bazaltovy vrh s zamkom ležuči v nizině rěky Labe)

Andy West Ranch pod Kunětickoju goroju

Program festivala počinal se prezentacijeju medžuslovjanskogo jezyka i potom byli različne mnogo interesne prědstavjenja na temy slovjanskogo tradicijnogo hudožstva, tancevanja, pěvanja, slovjanskoj ženskoj gimnastiky, staroslovjanskyh obredov i ritualov, trgovina s različnymi produktami (keramika, med i medovina, oblěkanje), koncert muziky i takože vuhan gongy i tajči. Byl takože program za dětka, možnost jezdy na konjah, i varjenje jediva na ognju.
kolo - slovjansko tancevanje

Denj 16-ogo jula byl umyslno izbrany. Stari slovjani v tute dnji prazdnovali lěto imajuče najvěčšu silu i takože gromovladara Peruna. Potom tutoj prazdnik proměnil se od prazdnovanja Peruna do prazdnovanja svetogo proroka Elijaša, kako nam v svojej rěči objasnil jedin iz organizatorov festivala - etnolog Zdeněk Ordelt, ktory domorodne tradicije studoval prvo u indijanskyh šamanov v Meksiku i potom svoje znanje i interes vložil do staroslovjanskyh tradicij.
Zdeněk Ordelt rukovodi staroslovjansky obred

prigotovjenje staroslovjanskogo obreda

Učestniki festivala dostali doborovoljny test razumivosti medžuslovjanskogo jezyka, ktori mnogi uspěšno razgadali i počeli interesovati se do medžuslovjansko projekta. Redakcija mnogo děkuje organizatoram najmě gospožam Mariji Krejčířovoj i Aje Marečkovoj, gospodinam Zdeňku Ordeltu i Petru Matušku i Janu Kroču, i ješče vsim členam družstva Rodokruh za možnost prezentovati medžuslovjansky jezyk i za prěkrasno prěžity denj na ranču pod Kunětickoju goroju.
Velika vam hvala i slava rodu!

Test razumivosti medžuslovjanskogo jezyka https://interslavic.news/doc/test-MS-jezyka.pdf

prezentacija medžuslovjanskogo jezyka od Vojtěcha Merunky

prezentacija medžuslovjanskogo jezyka od Timofeja Zagorskogo

QR-kod članka