Slovjanska kulturna diplomacija

kategorija: POLITIKA - EKONOMIJA datum: 2022-07-10, avtor: aVM

Tutoj tekst jesmo s Janom van Steenbergenom publikovali v godu 2017. Bylo to v našem časopisu i potom takože v čitateljniku:

Merunka, V., Steenbergen van, J. Slovjanska kulturna diplomacija, SWOT analiza, strategija, i taktika do budučnosti, aktivnost Slovjanskoj unije v Čehiji. V časopisu Slovjani.info, 2017, 2(2), stranice 63-76. ISSN 2570-7116 (on-line), ISSN 2570-7108 (tisk). Možno brati iz adresy https://slovjani.info/poiskaj/?kljucno=swot&od=2017&do=2017.
Čitateljnik – antologija tekstov v medžuslovjanskom jezyku. ISBN 978-80-907004-7-5 (on-line), ISBN 978-80-263-1407-3 (tisk). Možno brati iz adresy https://www.ceeol.com/search/chapter-detail?id=791201.

Na žalost, dnes poslě 5 lět, kogda vlada Rossijskoj federacije govori o nastupajučem novom světovom poredku i rossijska armija barbarsko atakuje do Ukrajiny, pokazuje se pravdivost naših slov, i bliži se najvyše pesimistična prognoza slovjanskoj budučnosti, o ktoroj jesmo pisali. Myšlenje iz Kremlja jest mnogo blizko fundamentalističnomu myšlenju teroristov iz Da’eš i Al-Ka’idy: Dobry svět uže byl v prošlom i vyše ne bude:

My uže iměli «zlaty věk», my uže byli prvi na světu, kogda byl veliky SSSR jakoby mytičny naslědnik hiperborejskoj staroslovjanskoj zemji – kako legendy o islamskoj imperiji staryh kalifov;
naš Stalin uže pobědil v světovoj vojně (1945) – kako Saladin nad križonoscami v 12-om stolětju;
my uže byli prvi v naukě i tehnikě (napr. Mendělejev, Gagarin), my uže iměli vse … ale potom nam to oni (Zapad, NATO, USA, EU, jevreji, bezbožniki, homoseksualisti, satanisti …) ukradli i našu svetu russko-slovjansku historiju izničili. To znači, že nam nyně trěba bojovati protiv vsemu světu aby odmstiti se.

Vměsto libokakoj pozitivnoj budučnosti naših dětok raste kult herojskoj smrti i apokaliptične vizije konca člověčstva. Jest to filozofija teroristov, ktori dobro znajut, že prigotoviti něčto novo i prospěšno jest mnogo težko (trěba velikoj raboty od mnogyh ljudij, energije, uma i znanja …) ale izniščiti něčto jest mnogo prostějše – napriměr stvoriti veliky dom potrvaje težku rabotu několiko lět, ale razrušiti tuto stvorjenje može libokaky glupec od eksplozije ili ognja v jedinoj minutě. Taky jest put nastupajučego novogo poredka, o ktorom govori rossijska vlada infikujuči vsej svět tutoju bolestju. Vsej svět tomu odgovorivaje prostym obrazom – on ne vidi toliko ekstremnu kremeljsku politiku, ale on vidi ugrozu vsej civilizaciji od slovjanov.

---

Tu jest naš stary tekst iz 2017, čitajte jego:
Slovjanska kulturna diplomacija
Vojtěch Merunka i Jan van Steenbergen motivacija
Slovjanske narody trěbujut iměti strategične instrumenty, ktorymi by mogli sobě pozitivno ovplyvnjati medžunarodnu situaciju. Trěba jest držati kontakty s črězgraničnymi ljudjami, ktori by znali slovjansku kulturu, da by oni kako sovezniki Slovjanov za naš profit pomagali poddrživati naše legitimne interesy v globalizovanom světu.
Procesy globalizacije i liberalizacije ne imajut dostatočny respekt do identičnosti i kulturno-historičnogo integriteta naših slovjanskyh narodov i držav. Takože, globalizacija i liberalizacija avtomatično ne znači lučši kvalitet života i lučšu uravenj demokracije. Evropa i vsej svět može se bystro destabilizovati i prěměniti. Zato jest nam trěba dělati strategiju razvoja i držanja kontaktov na obrazovanyh ljudij iz neslovjanskyh narodov, ktori by byli našimi simpatizantami znajučimi naše jezyky, kulturu, historiju i različne specifične črty, da by oni byli sposobni pomagati našim narodam kako naši partneri.
Naša aktualna situacija jest gorša od situacije v 19-om i na početku 20-ogo stolětja, kogda voznikali samostojne slovjanske državy (napr. Poljska, Čehoslovakija, Jugoslavija, Bulgarija, ...). V tutyh staryh vrěmenah bylo normalno, že na Zapadu (Pariž, London, New York, ...) slovjanske kulturne i naučne elity iměli bogate kontakty s elitami iz politiky. Hvala tutym kontaktam jesmo dobyli svobodu i demokraciju od staryh monarhij.
Dnes na opytu nedavnogo razpada Jugoslavije i aktualnoj tragedije v Ukrajině možemo viděti, že v globalnom ranku našu politiku i ekonomiju razrěšajut ljudi, ktori ne imajut dobre znanja o slovjanskoj kulturě i politikě i historiji, i zato mogut jih razsudženja byti protiv našim interesam. Navyše, slovjanske narody razděljaje politična granica medžu Zapadom i Rossijskoju federacijeju, kde trěba uvažati, že Slovjani živut na oboh stranicah tutoj granice. Tuta granica razděljaje evropsku civilizaciju uže od vrěmen rimskogo imperatora Diokleciana. My ne imajemo scenarij našego postupanja ni na slučaj vojny (može byti s islamom, Kitajem, Rossijskoju Federacijeju, Zapadom ...) ni na slučaj razpada EU. Na vse tute grozby jest trěba podgotoviti se. My ne jesmo protivniki neslovjanskyh narodov, ale oni nas malo znajut, i sut iz nas vozstrašeni.
Dolgovrěmenno planovanje ekonomije i politiky slovjanskyh držav formulujut črězgranični ljudi, ktori sut raznodušni k našim specifičnym interesam. Može byti, že budučnost bude tvoriti medžunarodnu politiku, ktora iznova bude protiv našim narodnym interesam, kako to uže bylo v prošlom vrěmeni. Bude li taky problem, kto na Zapadu znaje i hoče ohranjati naše interesy? Po tutoj pričině jest nam mnogo trěba držati dobre kulturno-diplomatične kontakty s našimi strategičnymi soveznikami, ktori by v vrěmeni krizy hotěli i znali nam pomagati i nas ohranjati. Do planovanja slovjanskoj kulturnoj diplomacije jest trěba takože pametati mnogo važnu medžuslovjansku orientaciju. Ako li politiki jednoj slovjanskoj državy rezignujut na kulturnu diplomaciju, pytajemo se, kde v drugyh slovjanskyh državah ju aplikujut. Budemo li v naših interesah zajedno, potom može diplomatična pomoč prihoditi od jednoj slovjanskoj državy i jejnyh kulturnyh soveznikov do drugoj slovjanskoj državy, ktora imaje problemy. No tuto ideju medžupomoči narušaje medialno popularna rusofobija i od njej iduči antislovjanizm političnyh prědstaviteljev něktoryh slovjanskyh narodov i takože propaganda velikorusskogo ekspansionizma, ktory ne hoče viděti različnost medžu slovjanskym i specifično russkym, i mysli, že vsi nerusski slovjani sut obvezani služiti rossijskym državnym interesam.
začto jest dnes taka nedobra situacija?
Vněšnji faktor: Slovjanske narody poslě II. světovoj vojny sut vsi byli v lagru socializma, ktory byl političnym protivnikom neslovjanskogo Zapada. Tuto razbudilo stare antagonizmy i šovinizmy medžu Slovjanami i ne-Slovjanami. V prošlom vrěmeni prěd komunizmom byli bulgarsky, češsky, poljsky, russky ... jezyky integralnoju čestju jedinogo evropskogo kulturnogo prostora od Atlantika do Urala. Ale dnes od propagandy hladnoj vojny sut vse slovjanske jezyky simbolom egzotiky i davajut konotacije primitivizma, barbarizma i nekulturnosti. Dnes sut napriměr azijatske jezyky v amerikanskyh filmah na lučšej poziciji od slovjanskyh, ktore sut toliko atributami negativnyh lic.
Vnutrišnji faktor: Kulturna diplomacija stoji na znanju narodnyh jezykov i na jihnom koriščenju v najširšem smyslu. Sami sobě dělajemo problemy, že ne starajemo se o našu budučnost. Naše universitety ne imajut interes držati kontakty s svojimi byvšimi studentami iz čudžih krajin. Ne davajemo lučše uslovja studentam iz Zapada, Azije i drugyh krajin světa, da by u nas studovali v naših slovjanskyh jezykah. Napriměr prěd 1990 v byvšej Bulgariji, Čehoslovakiji, Jugoslaviji ... byli bezplatne kursy narodnogo jezyka, kde studenti iz mnogyh krajin světa učili se narodny jezyk jedno lěto prěd universitetom. Dnes naše universitety učet črězgraničnyh studentov toliko v anglijskom jezyku, i nikto ne imaje interes bezplatno vozpityvati znanje narodnogo jezyka.
Na sravnjenje: Britanija, Francija, Němcija, Italija, ... poddrživajut znanje svojih jezykov. Organizujut specialne školy i sustrětenja. Oni razumějut, že tuta investicija jim davaje veliky kulturno-političny profit.
Efektivna kulturna diplomacija trěbuje znanje narodnyh jezykov. Ale my ne držimo strategiju poddržanja i širjenja svojih narodnyh jezykov, obače naše oficialne državne organy takože znajut medžunarodnu mobilnost studentov i učiteljev (AIESEC, ERASMUS, ...), no tuto jest v velikoj boljšině toliko na anglijskom jezyku i po tutoj pričině bez glubšego znanja našej kultury i historije. Potom nas črězgranični studenti i medžunarodni učitelji malo znajut, obače u nas doma prěživajut.
Ale v protivnom směru tuta sistema medžunarodnoj mobilnosti studentov i učiteljev dobro rabotaje: Naši studenti i učitelji koristeči ravne medžunarodne programy na svojih putovanjah do čudžih krajin u njih učet se v jihnyh domačih jezykah: anglijskom, francuzskom, němečskom ... teorija kulturnoj diplomacije
Smyslom kulturnoj diplomacije jest davati možnost ljudjam iz čudžih krajin poznati naš narod. Tuto jest možno s pomočju poddrživanja kulturnyh akcij, obměny znajemyh ljudij (naučnikov, muzikantov, teatralnyh i filmovyh aktorov, vsih drugyh artistov ...), universitetnogo sotrudženja, učenja jezykov i črězgraničnogo televizijnogo ili radiovogo širjenja. Cěljem sut ne toliko diplomati iz partnerskoj krajiny, no vsa občina partnerskoj krajiny i osoblivo jejna elita, ktore imajut potencial formovanja občego mněnja. Hvala modernym medijam (internet, televizija) i globalizaciji dnes raste značenje kulturnoj diplomacije kako instrumenta do politiky i ekonomije. Jest to kompleksna sebeprezentacija našej krajiny s pomočju metody širokogo informovanja ljudij iz drugoj krajiny za efektom formovanja publičnogo mněnja toj drugoj krajiny k našej krajině.
inspiracija iz Evropskoj Unije (Evropskogo Soveza)
«Kultura dnes ne jest toliko literatura ili teatr. Ona jest takože važnym instrumentom diplomacije. Kulturna diplomacija jest koristima do propagovanja demokracije i svobody do světa.» govori niderlandska evrodeputatica Marietje Schaake, ktora napisala Parlamentarny raport EU o evropskoj kulturnoj diplomaciji.
Forum slovjanskyh kultur, Ljubljana
Forum slovjanskyh kultur (FSK, http://www.fsk.si) jest nedržavna i neprofitna medžunarodna organizacija osnovana lěta 2004. Smyslom FSK jest vozživiti kreativnost Slovjanov i razvivati medžuslovjansky dialog v uslovjah modernogo globalnogo světa. FSK poddrživaje slovjanske studija i stipendijne programy. FSK hoče podpirati slovjansku sorabotu i odkryty razvoj slovjanskoj kultury v uslovjah prěměnlivogo globalnogo společenstva.
Projekt EU – MICReLa, Groningen
V Evropě govorimo mnogymi jezykami. Različnost naših jezykov jest velika evropska cěnnost, no jezyčna različnost može dělati problemy. Po tutoj pričině publikovala vysokouravnjeva grupa na mnogojezyčnost (HLGM – High Level Group on Multilingualism) prěgled svojih tem naučnogo raziskanja, da by byla ulěpšena komunikacija v Evropě pri sohranjenju mnogojezyčnogo bogatstva. Izprva grupa HLGM govori o nedostatku znanja o vzajemnoj razumlivosti blizkyh jezykov do komunikacije osnovanoj na receptivnoj mnogojezyčnosti. To znači razuměnje jezyku, ktory govornik ne znaje, no jest blizky jegovomu rodnomu jezyku, že govorniki mogut na sebe govoriti v svojih jezykah. Grupa HLGM takože govori o potrěbě novogo ocěnjenja anglijskogo jezyka kako universalnogo jezyka govornikov imajučih različne narodne jezyky i potrěbě raziskanja medžunarodnoj komunikacije v ramkah germanskoj, slovjanskoj i romanskoj jezyčnyh grup, može li napriměr komunikacija Slovjanov iz različnyh narodov v jih slovjanskyh jezykah byti alternativa jihnoj komunikacije v anglijskom jezyku. MICReLa jest Mutual Intelligibility of Closely Related Languages (vzajemna razumlivost blizko vezanyh jezykov) http://www.let.rug.nl/gooskens/project.
Naša kolegica Jelena Golubović napisala v ramkah tutogo projekta svoj naučny projekt vzajemnogo razuměnja medžu slovjanskymi jezykami kako svoju disertaciju na Državnom Universitetu v Groningen v Holandiji.
Programy Evropskoj Komisije: Commenius – Grundtvig i Erasmus
EU davaje granty na kursy vseživotnogo obrazovanja i mobilnosti ljudij. Iz budžeta EU jest transport, prěživanje i poplatok za učenje. Može se organizovati napriměr lětna škola ili konferencija. Tute projekty poddrživajut ideju, že obrazovanje trěba byti dostupnym vsim ljudjam po vsej život. Take obrazovanje ne jest toliko znanje, no takože gradžanska odgovornost i kulturne razvoje. Vse krajiny EU imajut svoje Narodne koordinacijne agentury za Evropske programy obrazovanja. Iz grantov možno platiti putovanje, prěživanje, vizu, podgotovjenje kursa i platu za učenje učestnika.
Tute evropske programy nesut imena holandskogo naučnika i augustinijanskogo monaha Desiderija Erasmusa Rotterdamskogo (1466–1536), ktory byl jednym iz osnovateljev evropskogo renesansa i humanizma, i češskogo naučnika, poslědnogo episkopa crkve Jednoty Bratskoj i osnovatelja modernoj pedagogiky Jana Amosa Komenskogo (1592–1670), i danskogo luteranskogo pastora, politika i teoretika pedagogiky Nikolaja Frederika Severina Grundtviga (1783–1872). Oni tri sut osnovateljami evropskoj tradicije vseživotnogo učenja ne toliko v mladom ale i v vozrastlom věku člověka. Jihna ideja byla davati vsim ljudjam vsej život dostupnu možnost obrazovanja, ktoro sodržaje ne toliko znanje no takože gradžansku odgovornost i kulturny razvoj.
SWOT Analiza
četyri možnosti strategije

možnosti multikulturnogo občežitja
Kanadsky psiholog i sociolog John W. Berry, avtor teorije akulturacije, popisyvaje različne možnosti razvoja odnošenj medžu ljudjami različnyh narodov v multikulturnyh uslovjah.

BERRY John W. (2013) Intercultural Relations in Plural Societies: Research Derived from Multiculturalism Policy. Acta de investigación psicológica, ISSN 2007-4719.

medžunarodne odnošenja v multikulturnyh uslovjah (Berry, 2013)

Berry popisyvaje dva faktory do prognozy razvoja občežitja ljudij različnyh narodov:

horizontalna dimensija – Volja ili nevolja držati svoje kulturne naslědstvo i identičnost.
vertikalna dimensija – Volja ili nevolja razvivati medžukulturne odnošenja s drugymi.

Tutoj model tvori dvě dimensije, ktore davajut četyri kombinacije rezultata. Do modela ješče trěba pridati velikost etničnyh občin. Na lěvom diagramu jest popisanje situacije maloj občiny medžu drugymi narodami, na pravom (desnom) diagramu jest popisanje situacije velikoj občiny medžu drugymi narodami. Slovjanska kulturna diplomacija imaje ješče dvě specifične uravnje:

Slovjanske narody vzajemno medžu seboju. Napriměr tu jest znajema neravna situacija medžu vozhodnymi slovjanami, ktora dělaje kulturnu marginalizaciju i asimilaciju Ukrajincev i Bělorusov do russkojezyčnogo etnika.
Slovjanske narody kako jedin blok v odnošenju k neslovjanskym narodam vsej Zemje. Globalna občina imaje zlu izkušenost iz muslimanskogo světa, kde kombinacija vysokoj motivacije muslimanov držati svoju kulturnu identičnost s jihnoju vysokoju nevolju razvivati medžukulturne odnošenja dělaje važne problemy separacije i segregacije muslimanov iduče do terorizma i razbojnyh konfliktov.

vnutrišnja analiza – slovjanske prědnosti

Blizkost kultur i blizkost naših jezykov, kulturna i jezyčna sebeinterpretacija.
Bogata narodna kultura slovjanov, napr. folklorne kluby i asociacije.
Dobre znanje tradicijnyh rěmesl, možnost jih sojedinjenja s projektami vseživotnogo obrazovanja.
Možno nastaviti naš opyt iz vrěmene prěd 1990, kontakty dodnes imajemo. (napr. Kuba, Vietnam, Orient, ...)
Imajemo historično dokazane projekty slovjanskoj medžupomoči. Napriměr rossijska pomoč do osvobodženja Srbije i Bulgarije od Osmanov ili češska pomoč do tvorjenja bulgarskoj i jugoslavskoj industrialnoj bazy.
Imajemo v světu znajemyh naučnikov, inovatorov, lica iz kultury, industrije, sporta (napr. Kopernik, Tesla, Mendělejev, Ciolkovskij, Sikorski, Ressel, Baťa, ...) Ne toliko v historiji, ale něktori živut v dnešnom vrěmeni, mnogi živut v čudžih krajinah.
V naših krajinah sut mnoge občiny i organizacije, jihže program jest slovjanska ideja. Kulturna diplomacija može byti našim zajednym strategičnym interesom.
Imajemo občiny i organizacije slovjanskyh rodžakov medžu emigrantami. Oni sut v vsem světu, najmě v Kanadě i USA. Jihny opyt i kontakty sut idealna možnost realizacije slovjanskoj kulturnoj diplomacije.
Imajemo pomočny slovjansky medžujezyk, ktory nam može zaměniti absurdnost koriščenja anglijskogo jezyka od mladyh ljudij do medžu-slovjanskoj besědy.
Čto ješče?

vnutrišnja analiza – slovjanske slabosti

Jest li realny interes i sposobnost do sorabotanja slovjanov v kulturnoj diplomaciji? Kako gluboke sut kulturne raznice medžu slovjanami?
Imajemo bogaty folklor i staru narodnu kulturu, ale čto novogo i modernogo možemo davati do světa?
Slabe odnošenja v oblasti medžuslovjanskoj nauky i tehniky. Lučše i boljše sorabotajemo s neslovjanskymi narodami od soraboty medžu našimi narodami. Najmě naša mlada generacija ne sorabotaje.
Slabe odnošenja v oblasti medžuslovjanskogo hudožstva. Toliko prezentujemo medžu seboju jedin drugogo, ale realne medžuslovjanske kulturne projekty ne imajemo.
Razpad multinarodnyh slovjanskyh držav na male jednonarodne državy (Jugoslavija, Čehoslovakija, Sovětsky Sovez).
Ne pomagajemo Lužičskym Srbam protiv jihnoj asimilaciji do němečskogo etnika.
Šovinizm i historične reminiscencije slovjanskyh narodov. Slovjanske državy imajut različne interpretacije našej historije, bo imajut različne aktualne ideologije i protivne politične interesy, manipulacija s faktami.
Zly historičny opyt s koriščenjem krizy slovjanskogo sosěda za sebe. Napriměr poljska okupacija graničnogo ozemja Češskoslovačskoj republiky v 1938, osnovanje Slovačskogo štata v 1939, hrvatsko-srbske odnošenja, i dnes takože rossijsko odnošenje k Ukrajině.
Poddržanje slovjanskoj kultury i nauky ne može byti toliko širjenje russkogo jezyka i russkoj kultury bez drugyh slovjanskyh narodov, ale pravda jest, že bez velikogo russkogo potenciala ne možemo dobro dělati slovjansku kulturnu diplomaciju.
Kulturna nekomunikacija medžu slovjanskym latinskokulturnym zapadom i grěčskokulturnym vozhodom znajema kako problemy Kyrilica/Latinica i religij. Ne byli jesmo sposobni dogovoriti se na slovjanskoj transkripciji medžu našimi dvoma abecedami. Zaměsto dogovora koristi se slovjanam neprirodno prěpisanje medžu Kyriliceju i Latiniceju iz anglijskogo jezyka.
Ljudi i najmě naša mlada generacija ne imajut znanje libokakogo drugogo slovjanskogo jezyka od svojego rodnogo. Obače jest znajemo, že kto znaje dva ili vyše slovjanskyh jezykov, toj može lučše pasivno razuměti vsim slovjanskym jezykam. V tutom naša mlada generacija popuščaje znanje slovjanskoj identičnosti. Potom mladi ljudi iz sosědnyh slovjanskyh krajin lučše besědujut v anglijskom jezyku, bo blizkomu jezyku svojego sosěda ne hočut ili ne mogut razuměti.
Čto ješče?

vněšnja analiza – udobnomožnosti od neslovjanskogo světa do nas

Okolna občina nas interpretuje kako jedinstvo.
V Evropskoj Uniji jesmo grupa sobě blizkyh narodov imajuča 70 mil. ljudij i v Rossijskoj Federaciji 90 mil. ljudij. K tomu ješče Ukrajina, Bělorus, Srbija, Makedonija, Črna Gora i vsi ljudi na Zemje, ktori znajut govoriti v libokakom slovjanskom jezyku, čto vkupě čitaje približno 300 mil. ljudij.
Slovjanske krajiny imajut znajemu poziciju v Sovětu Evropy i Organizacije za Bezopasnost i Sotrudženje v Evropě, UNESCO i drugyh.
Slovjanske krajiny sut členami Vyšegradskoj grupy V4. (V4 jest politična organizacija za sorabotanje Poljsky, Čehije, Slovakije i Madjarske s partnerstvom Slovenije, https://en.wikipedia.org/wiki/Visegrád_Group)
Otvorjeny i svobodny Internet. Publikacijne možnosti na Internetu.
Možemo stvoriti kulturnu sorabotu s grěkami s pomočju južnyh slovjanov.
Blizko bude jubilej 100 lět od konca prvoj světovoj vojny (1914–1918), kogda sut vozniknuli moderne slovjanske demokratični državy iz razpada staryh monarhij. Tutoj jubilej bude prazdnovany vsimi državami.
Historične sobytja, kogda slovjani obranili i spasili evropsku civilizaciju od izniščenja. Napriměr poljske (bitva u Vieny 11. septembra 1683) i rossijske vojny v 18-om stolětju, ktore osvobodily Evropu od islamskoj invazije.
Čto ješče?

vněšnja analiza – grozby od neslovjanskogo světa do nas

Slovjanska kulturna ideja ne jest popularna, najmě u mladyh ljudij. Svět nas interpretuje kako nedemokratične i primitivne narody iz pričiny hladnovojennoj propagandy, kogda jesmo vsi byli v lagru socializma pod dominacijeju SSSR. Zle nazrěnja na našu kulturu i slovjanske aktivitety (zagovor: vsaky slovjan jest kremeljsky agent ili komunist, ale protiv tomu vsaky neslovjan jest demokrat).
Problematične politične vezy medžu Zapadom i Rossijskoju federacijeju.
Svět ne znaje različati medžu slovjanskoju i specifično russkoju kulturoju.
Obvinjenja iz nacionalizma i šovinizma v vseslovjanskyh aktivitetah.
Svět nas malo znaje. Najmě ne znaje naše jezyky. Po tutoj pričině mysli se, že my jesmo primitivni. Svět ne znaje naše jezyky i ne interesuje se do njih.
Mnogo stolětij budovane osoblive vezy s evropskymi krajinami byli prěměnjene v novoj realnosti EU. Napr. tradicijny slovjansky soveznik Francija i tradicijny slovjansky neprijatelj Němcija ne sut dnes sobě neprijateljami, ale oni zajedno kooperujut s novym mněnjem o našej slovjanskoj ideji.
Čto ješče?

diskusija
Slovjansky svět trěbuje novy strategičny plan, ktory jasno popisal by novu strategičnu metu naših narodov.
V 19-om stolětju strategična meta bylo bojevanje za narodnu samostojnost, bo togda jedina slovjanska država, kde iměli prědstavitelja i vladu iz svojego naroda, byla Rossija. Tuta meta byla uspěšno izpolnjena blagodareči slovjanskoj kulturnoj i političnoj emancipaciji. Koncem 19-ogo i na početku 20-ogo stolětja vozniknulo mnogo novyh slovjanskyh držav. Mnogonarodne državy poslě razpada SSSR, Jugoslavije i Čehoslovakije v 1990-yh lětah prěměnili se na samostojne jedinonarodne državy. Toliko Lužičski Srbi dnes ne imajut svoju narodnu državu.
Dnes slovjani trěbujut novu strategičnu metu, ktora byla by orientovana do budučnosti i ktora by reflektovala nove udobnomožnosti i nove grozby. nova strategija do budučnosti
Jedina možna nevojenna strategija modernyh slovjanskyh narodov držeča naše kulturne naslědstvo i identičnost jest sorabota s drugymi civilizovanymi narodami.
Dělati někaku slovjansku alternativu (praktično to znači opoziciju) protiv globalnoj civilizaciji by Slovjanov stavilo do vojennogo konflikta s globalnoju civilizaciju i do naslědnoj separacije i segregacije, ktora by byla mnogo blizka pesimističnoj prognozě muslimanskoj budučnosti. My ne možemo sebe obstupiti sentimentom po idealizovanoj prošlosti někakogo «zlatogo věka» i staviti se do opozicije protiv «fašističnomu i bezbožnomu» modernomu světu.
Taka opozicija praktično byla by usiljem na povratno putovanje do fiktivnoj prošlosti, ktora by značila konec slovjanskogo vklada do razvoja modernogo světa i odkryla by Pandorinu krabku s konspiracijnymi teorijami o globalnom zagovoru protiv Slovjanam.
kakoju taktikoju?
Taktika jest praktičny pristup do realizacije strategičnoj mety, ktora jest tvorjena množinoju različnyh praktičnyh podrobno kontrolovanyh projektov.
AIDA (http://www.mindtools.com/pages/article/AIDA.htm) sut v kratkosti četyri anglijske slova: attention – interest – desire – action. Jest to model popisyvajuči proces raboty marketingovoj reklamy ili propagovanja i jest to dobro koristimy priručnik na planovanje i kontrolovanje společenskyh projektov. Model AIDA (razširjena jego varianta jest AIDAS) tvori naslědstvo postupnyh krokov, ktoryh jest trěba do uspěha projekta. Vsaky postupny krok jest kritično važny i jegovoj neuspěh jest neuspěhom vsego projekta.
model AIDAS

uvažanje (A – attention) Smyslom tutogo kroka jest privabiti vnimanje ljudij webovymi stranicami, tlačenymi medijami, televizijeju i radiom, i personalnymi kontaktami (prijatelji, sosědi). Tu trěbujemo koristiti ne toliko pristupajuču taktiku, v ktoroj davajemo svobodny pristup k centralno zapisanym informacijam (napr. k publičnym webovym stranicam, ktore čitatelj trěbuje sobě pogledati i odkryti), ale ješče distributivnu taktiku, v ktoroj jest informacija adresno razsylana od avtorov k potencialnym zainteresovanym čitateljam (napr. e-pošta).
interes (I – interest) Smyslom tutogo kroka jest u ljudij vozbuditi interes, da by oni prěměnili svoje vnimanje, že by oni sami znali i odkryvali naše informacijne iztočniky.
želanje (D – desire) Smyslom tutogo kroka jest u ljudij vozbuditi želanje učestvovati, da by oni hotěli našu strategičnu metu aktivno podporiti.
čin (A – action) Smyslom tutogo kroka jest realne učestvovanje ljudij napriměr na konferenciji, naučnoj ili kulturnoj akciji, kupovanje knig, itd.
zadovoljstvo (S – satisfaction) Smyslom tutogo kroka jest znati realny rezultat projekta. Uspěh projekta dělajut jego učestniki, ktori sut s projektom zadovoljeni, hočut jego prodolženje, i oni sami rekomendujut drugym ljudjam učestvovati v projektu. Tuto jest mnogo važne do novyh naslědnyh projektov, bo jih može podporiti ili komplikovati.

medžunarodne festivaly kultura UNESCO i sorabota narodov
Glavnym organizatorom festivala jest češsko družstvo Slovanská unie z. s., ktoro naleži do najstarših slovjanskyh družstv Češskoj republiky. Družstvo bylo osnovano lětom 1992 češskym pisateljem Aleksejem Pludekom i svoju tradiciju bere od Prvogo slovjanskogo sjezda lětom 1848 v Pragě, na ktorom učestvovali znajeme lica medžunarodnogo slovjanskogo dviženja i ktoromu prědsědal otec češskogo naroda i osnovatelj vseslovjanskogo dviženja František Palacký. Družstvo jest samostojno juridično lico IČ 48133396, ktoro jest aktivno na teritoriji Češskoj republiky pod češskym zakonodateljstvom. U kulturnoj agentury Evropskoj komisije EACEA (Education, Audiovisual and Culture Executive Agency of the European Commission) jest registrovano pod partnerskym kodom 923564549 i jest kontaktnym licem za Češsku republiku u Medžunarodnoj ustanovy Forum slovjanskyh kultur v Ljubljaně v Sloveniji.
Medžunarodny festival vozniknul iz aktualnoj potrěbnosti boljšego medžunarodnogo sobytja na temu kulturnyh i historičnyh korenev vsih slovjanskyh krajin i narodov v terminu konca maja i početka juna i potrěbnosti koristiti tradiciju slovjanskoj kultury, pismennosti i vzajemnosti s odkazom naslědstva misije svetyh Kyrilla i Methodija do generovanja novyh kulturnyh projektov. Pozitivne rezultaty prvyh lět festivala i sorabota znajemyh lic slovjanskoj kultury i nauky dali možnost do uspěšnogo razvitja tutogo projekta i jego zaključenja do strategičnogo plana medžunarodnoj organizacije Forum slovjanskyh kultur.
Uspěh festivala tvori možnost razširjenja tutogo modela i tradicije do drugyh slovjanskyh krajin, najmě v sorabotě s Forumom slovjanskyh kultur.
naučne medžunarodne konferencije o medžuslovjanskom jezyku
Naše konferencije sut prvym oficialnym i publično otvorjenym zasědanjem, na ktorom zvučal i byl koriščeny medžuslovjansky zonalny jezyk, ktory opravdal se byti instrumentom do pisanja i besědy pričitajuči naučne temy kako napr. historija, lingvistika ili pedagogika. Obače na konferencijah byli ljudi iz različnyh slovjanskyh krajin, dostatočno bylo prěkladati prezentacije i diskusiju toliko do jednogo jezyka razumlivogo vsim: medžuslovjanskogo. Dobyli jesmo opyt, že kogda prezentacija jest pisana v medžuslovjanskom jezyku, govornik može prezentovati v svojem rodnom slovjanskom jezyku bez prěkladatelja. Tutoj princip bude trěba držati v budučih zasědanjah.
QR-kod članka